نكت مغربية

واحد خرجوه من الامتحان ديال الرياضيات علاش
لقاوه كاتب جدول الضرب مورا الكاليكاتريس



واحد الراجل خارج من لوزين، وهو يتعرض ليه واحد الشفار هلكو مزيان وخدا ليه الخلصة ديالو
من بعد 15 يوم، كان الراجل خارج عاوتاني من لوزين، وهو يتعرض ليه نفس الشفار
يالله بغى يعطيه قتلة ديال العصا تاني، وهو يقول ليه الراجل: حبس أخويا، هاك الخلصة ديالي، بلا ما تضربني
شد من عندو الشفار الفلوس، وبقا عليه حتى سلخو
قال ليه الراجل: الله يا خويا، عطيناك الفلوس وهلكتينا
قال ليه الشفار: أنا ندي شي حاجة بعرق كتافي

واحد المكلخ سولوه: أشنو هو أهم أسباب الطلاق؟
فكر المكلخ شوية وقال ليهم: الجواج

هادا واحد مشى يخطب. ملي سولو بات العروسة فاش خدام كاليه دريدور.
نوض بات البنت الحيحة باش يزوجهم، قال مع راسو ضروري هادا شي شخصية مهمة وما خاصنيش نفلتو.
ملي مشاو عند العدول، سولوا العريس: فاش خدام؟
قال ليهم العريس: دريدور نعام اسيدي
قالوا ليه العدول: اشنا هي هاد الخدمة؟
قال ليهم العريس: الدريدور ملي نعام اس كتعجن الشباكية وكطيب، كندردر من فوقها الجنجلا


هادا واحد الاستاد كيعلم لواحد التلميد عملية ناقص، قال ليه: جوج ناقص جوج شحال تيبقى ؟
التلميد : معرفتش
الاستاد جبد ليه جوج كرواصات، وقال ليه : شحال هادو؟
التلميد :جوج كرواصات
الاستاد :هاك كول هادي، زيدك هادي، شنو بقى دابا ؟
التلميد: شي بـرّاد ديال اتاي بعقلو


علي وبراهيم تشاركوا ف حانوت

واحد النهار، ناض علي علق على الحانوت پلاكة مكتوب عليها بالفرنسية

Alimentation générale

جاء براهيم قرا الپلاكة وكعا، وهو يبدلها ودار فيها

Brahimentation générale

طبلة ليك، وناموسية للي عزيز عليك

هادو رباعة ديال المكلخين عندهم حفرة فالحومة، ناضوا تجمعو باش يلقاو شي حل
قال ليهم واحد: نديروا شي فرملي ف الحفرة، باش اللي طاح فيها يداويه ف البلاصة
قال ليهم واحد اخر: لا نجيبو لابيلانص حدا الحفرة، باش اللي طاح نديوه فيساع للسبيطار
هدر واحد اخر: نريبوا داك السبيطار، ونبنيو واحد اخر
ناض واحد قال ليهم: وا لا! خاصنا نسدو هاديك الحفرة...
ونحفروا وحدة أخرى قدام السبيطار

هادوا تلاتة ديال الصحاب تفارضو فدجاجة محمرة وشراوها
منين جاو ياكلوها مالقاوش الخبز، ناضو صيفطو واحد منهم يجيب ليهم الخبز
تسناوه ساعة ما جاش
تسناوه ساعتين ما جاش
تسناوه تلت سوايع ما جاش
طلع ليهم الدم، وقالوا صافي عيق، ملي يجي ياكل هو الخبز
وهو نيت يخرج ليهوم من مورا الباب، وقال ليهم: شفتوا كون مشيت؟

هادا واحد معصب ما كيحملش يعاود الهدرة جوج مرات
مشى عند واحد الحانوت قال ليه: عندك الحليب؟
قال ليه مول الحانوت: لا
مشى المعصب عند حانوت اخر وقال ليه: و نتا؟

واحد سكران مشى لدارو
لاحت ليه مرتو الساروت، وتلف على الثقبة ديال الباب
غوت عليها قال ليها: لحتي الساروت إيوا لوحي التقبة

واحد الغليض مشى عند الطبيب وقال ليه: بغيت ندير ريجيم، تقهرت بهاد الغلض
قال ليه الطبيب: كول نص خبزة ف الفطور، ونص خبزة ف الغدا، ونص خبزة ف العشا
قال ليه الغليض: واش قبل الماكلة أولا بعد منها؟

هادا واحد المبوق، ملي كيضرب البرق، كيفرنس
كيصحاب ليه كيصوروه

أستاذ ديال الإنجليزية قال لواحد التلميد: دير ليا
She has
في جملة مفيدة
قال ليه التلميذ : شي هاز اللحم وشي هاز الهم

ههههههههههههههههههههههههههه مررررررة حلوة